वैद्य-वार्ता

उद्योग वाणिज्य महासंघका अध्यक्ष सुरज वैद्य नेतृत्वको टोलीले राजनीतिक निकासका लागि दबाब दिन नेताहरू भेट्ने अभियान चलायो। राजनीतिक निकास त्यस्तै हो, दसैँको मौका पारेर हातचाहिँ मिलायो। 

त्यही क्रममा व्यवसायी टोली नेकपा-माओवादीका अध्यक्ष वैद्यकहाँ पुग्यो। वार्ता राजनीतिक निकासभन्दा पनि भारतीय नम्बरप्लेटका गाडी र हिन्दी चलचित्रको निकासमा केन्दि्रत रह्यो। दुई वैद्यको भेट भएपछि ओखतीमूलोको चर्चा नहुने कुरै भएन। व्यापारी वैद्यले भने, "तपाईंहरूको आन्दोलनले हामी सब व्यापारीलाई कब्जियत भयो। हाम्रा सामान उतै थन्किए। दसैँको मौकामा पूरै व्यापार थला पर्‍यो। हिन्दी चलचित्र बजाउन नपाएपछि दसैँ पनि खल्लो हुने भो, सारा नेपालीलाई।" नेता वैद्यले बीचैमा भने, "केको सारा नेपालीको कुरा गर्ने ? तपाईंहरू प्रचण्डबाहेक कसैको उपचार नगर्ने ! म आफँै वैद्य भएर के भो, यसो कहिलेकाहीँ तपाईंहरूको ओखतीमूलो पनि चाहिन्छ नि हामीलाई !" 

हुन पनि, त्यतिका भारतीय चोरीका गाडीमा सरर्र चढ्ने नेताहरू न सरकारमा छन्, न उद्यमी, व्यापारीले पत्याउने। गाउँतिर गएर पहिलाजस्तो धम्काएर खाने अवस्था पनि छैन। गाडी गुडाउनै पर्‍यो। सहरको बसाइ छ। सबै कुरा व्यापारीकै ओखतीमूलोमा चल्नु छ। अनि, व्यापारी वैद्यहरूले अहिलेको अहिल्यै नाफा हेर्न मिल्छ, सरकारी माओवादीलाई मात्रै ओखतीमूलो चढाएर ? यसो प्रतिपक्षीलाई पनि चढाउनुपरेन ? सरकारमा पहुँच नभएका अन्य संगठनलाई ओखतीमूलो गरििदने सामाजिक दायित्व पनि त हो नि उनीहरूको, कसो वैद्य बा !
http://www.ekantipur.com/nepal/article/?id=4384